As
organizacións sindicais e estudantís galegas acordaron
convocar folga en todas as universidades públicas galegas e para
todo o seu persoal o próximo 24 de marzo.
1. O Goberno do
estado acaba de aprobar o RD 43/2015 (3+2) modificando a
ordenación das ensinanzas universitarias coa oposición de toda
a comunidade universitaria, da Conferencia de Reitores (CRUE) e de
todos os partidos e forzas sindicais, sen dar un debate político
nin social nun tema que trastorna de xeito radical a universidade.
Faise tamén sen unha avaliación da implantación da aplicación
do proceso de "Bolonia", cunha clara vontade de degradar
as titulacións e reducir a calidade das universidades públicas.
Facilita igualmente a expansión das universidades privadas no
ámbito dos mestrados e titulacións curtas, única forma de que
compitan coa oferta das universidades públicas con profesorado
máis cualificado e ata os últimos tempos con prezos máis
educación e investigación
2. Xa a reforma implantada co Real
Decreto-Lei 14/2012 das taxas universitarias e o encargo docente
do profesorado atacaran os outros dous factores de competitividade
das universidades públicas: os prezos e un equilibrio na
actividade docente e investigadora que permite ofrecer unha
docencia de calidade. Ao encarecemento das taxas e ao empeoramento
das condicións de traballo do profesorado, súmase agora un
ataque frontal ao sistema de titulacións.
3. Nos últimos
meses de mandato, o Goberno do estado quere aínda aprobar dous
reais decretos que modificarán os requisitos para a creación de
centros e universidades e o sistema de acreditación do profesorado
universitario funcionario, requisito para o acceso á
profesión
docente e investigadora. Co primeiro, na práctica,
busca flexibilizar as condicións para a creación de novos campus
privados, afondando nunha dinámica que levou a que se creasen 14
universidades privadas novas nos últimos 14 anos, mentres o
número das públicas se mantiña estábel.
4. A proposta
ministerial de Real Decreto de acreditación do PDI estabelece un
sistema menos obxectivo, menos transparente e menos imparcial e
continúa subestimando a actividade docente fronte
á investigación.
5. En Galiza, o goberno da Xunta
colabora activamente nesta cruzada contra o papel da universidade.
A eliminación precipitada de titulacións, polos límites de
alumnado imposto, faise cando aínda acaban de rematar en moitas
titulacións as primeiras promocións de estudantes do Plan
Bolonia e impide a consolidación da oferta educativa. As taxas de
segunda matrícula e sucesivas e as de mestrado alcanzan unhas
contías que superan amplamente as da maioría de
países europeos.
6. Tamén os recortes impostos pola Xunta
de Galicia foron intensos: 86 millóns de euros menos de
financiamento das universidades en tan só cinco anos. O anuncio
de que o novo Plan de Financiamento en negociación non vai
mellorar a baixísima porcentaxe do PIB destinado ao ensino
universitario e camiña cara a consolidar a aposta por
un financiamento variábel crecente, mentres que o estrutural non
cobre os gastos básicos de funcionamento das universidades.
A
implantación de Boloña (1 ano menos de estudos) e a crise
fixeron que as universidades galegas perdesen 5053 estudantes
(-7,26%) desde o curso 2009/10. As taxas e bolsas seguen impedindo
o acceso a unha formación completa ao estudantado con menos
recursos económicos. Os e as estudantes galegas perderon un 17,7%
das bolsas de mobilidade ERASMUS en 2013/14 (mentres que a media
estatal foi do -7%).
O PDI das universidades galegas é o
segundo máis envellecido do estado. Hai 350 postos de traballo
menos nunha espiral de falta de renovación e promoción que pon
en risco a continuidade de titulacións e a da actividade
investigadora.
Galicia perdeu tamén 1287 investigadores e
investigadoras entre 2010 e 2013. O investimento en I+D descendeu
pasando de ocupar a posición 7 ao número 11, cun recorte de case
o 20% que dobra a media dos recortes do resto do estado.
Por
todo iso, facemos un chamamento á comunidade universitaria a sumarse
á folga do vindeiro 24 de marzo e a participar nas mobilizacións
e á sociedade, en xeral, a acompañarnos na defensa
das universidades públicas, necesarias para o futuro do noso
país.
Non ao Decreto 3+2
Non aos recortes en educación e
investigación
Non á privatización do ensino universitario
Non
á precariedade laboral
Por unha equiparación das taxas de grao e
mestrado.
Por unha política de bolsas que incremente o número e
contía e
garantan un acceso real ao ensino público superior.
Por
un sistema universitario galego cun financiamento estrutural
estábel
e suficiente.
Por unha política de dotación de persoal que
permita a renovación e
garanta o mantemento das titulacións e o
impulso da I+D.
As Universidades galegas polo ensino público
para todas e todos, contra os recortes e por unha sociedade máis
formada e cunha investigación de calidade.
CIG Ensino,
CCOO, UGT, CSI-F
Comités, Liga Estudantil Galega, AGIR, Sindicato
de Estudantes, Acción
Universitaria
Coa túa opinión traballamos mellor
Publicar un comentario
Coa túa opinión traballamos mellor, grazas.